"Yakuza" və "Like a Dragon" seriyaları ilə tanınan məşhur "Ryu Ga Gotoku" (RGG) studiyasının yeni döyüş oyunu "Stranger Than Heaven" uzun müddətdir geymerlərin böyük maraqla gözlədiyi layihələrdən biridir. Lakin "Summer Game Fest 2026" tədbirində oyunun aktyor heyəti elan olunarkən böyük təəccüb doğurdu. Snoop Dogg və digər tanınmış simalarla yanaşı, heyətdə 30 il əvvəl qətlə yetirilmiş əfsanəvi reper Tupac Shakur da yer alacağı açıqlandı. RGG studiyasının rəhbəri Masayoşi Yokoyama bu qərarın pərdəarxasından və reperin xatirəsini necə qoruduqlarından danışıb.
Yokoyamanın sözlərinə görə, bu qeyri-adi ideyanın təməli Snoop Dogg ilə qoyulub. Məşhur sənətçi oyunda Orpheus adlı olduqca vacib bir personajı canlandırır. Ssenari üzərində işləyərkən komanda Snoop-un real həyatdakı münasibətlərini və dostluq münasibətlərini oyuna köçürmək qərarına gəlib.
Oyunda fərqli ölkələrdən gələn və cəmiyyət tərəfindən kənarlaşdırılan bir çox personaj var. Snoop Dogg ilə müzakirələr zamanı real həyatdakı dostluq əlaqələrini oyunda bir növ güzgü effekti ilə canlandırmaq fikri ortaya çıxıb. Yokoyama qeyd edir ki, bu rola kimin uyğun gələcəyini Snoop-un özündən soruşduqda, o, birbaşa Tupac-ın adını çəkib. Hətta studiyadakı bəzi tərtibatçılar belə bu iki dostun oyunda yenidən bir araya gəlməsi ideyasını eşidəndə kövrəldiklərini bildiriblər.
Tupac-ın obrazını oyuna gətirmək göründüyü qədər asan olmayıb. Hazırda reperin ailəsi ilə onun rəqəmsal hüquqlarına sahib olan musiqi meneceri Tom Tom Whalley arasında ciddi hüquqi mübarizə gedir. RGG studiyası bu problemi həll etmək üçün həm rəsmi hüquq sahibləri, həm də Tupac-ın sağ qalan ailə üzvləri ilə birbaşa danışıqlara başlayıb.
Yokoyama bildirir ki, komanda üçün ən vacib məqam reperin xatirəsini ləkələməmək olub. Bu səbəbdən ailə ilə ssenarinin süjetində məsləhətləşmələr aparılıb və tam razılıq alınıb.
Studiyanın yanaşmasında ən diqqətçəkən məqam odur ki, onlar Tupac-ın 1996-cı ildəki sonuncu görünüşünü kopyalamaq istəmirlər. Komanda fərqli bir suala cavab axtarır: "Əgər Tupac bu gün yaşasaydı, 30 il sonra necə davranar, özünü necə ifadə edərdi?"
Ailənin dəstəyi ilə yaradılan bu rəqəmsal obraz reperin keçmişini deyil, onun yaşaya biləcəyi potensial gələcəyi vizuallaşdırır. Təbii ki, ölümündən 30 il keçmiş bir sənətçinin rəqəmsal olaraq canlandırılması oyun dünyasında hələ uzun müddət müzakirələrə səbəb olacaqdır.
"Stranger Than Heaven" gələn il yanvarın 15-də işıq üzü görəcək.
